الذكرى ال 33 ليوم الارض

بعدما كان يوم الارض اول هبة وطنية لعرب الداخل لأبراز عضلاتنا امام السلطة القامعة، اصبح وللأسف مناسبة لابراز عضلاتنا على بعضنا

يعني ليش كمية اعلام الجبهة طلعت وبكثافة من عرابة متلا؟ (اه صح.. غاد الانتخابات البلدية مخلصتش)

الله ستر ما وقعتش طوشة وقت المهرجان بدير حنا بين الجبهة والاسلامية... واللي كان شاف شو صار من مسخرة مسرحيدية على المسرح اللي قدمها بعض الخطباء وبعض من سرقوا الميكرفون ليحيو الشبيبة الشيوعية

اه والله كانت وقافة على تكة... بالاخر طرو الناس وفرفطوها بكير

"شوفة عينك" حاول يدحش حالو ما بين المتزمجرين غضبا على الاحقية التاريخية ليوم الارض، الا انه قرف

نعم انا قرفت في الذكرى ال 33 ليوم الارض وبطلت اغدر اتحمل مسكت حالي وروحت لحالي (بتكسي سبشل) مش مع باص بلدنا، والقيادة حمتها على المزبوط



اللي كان شاف .. واللي شاف قرف... واللي شاف ومقرفش الله يقرفو هو الثاني... منيييح هييك؟؟؟؟


منشوفكو بيوم ارض الاضلات الجاي..بااي.

ملاحظلات للتنويه مما اقتضى التنويه:

*التجمع ايضا رفع اعلاما له.

من ايجابيات زيارة قطعان مارزل الى ام الفحم

بعد مشاركة "شوفة عينك" في احداث ام الفحم(اجيت بتكسي سبشل من قبل بليلة)، من الواضح ان زيارة اليمين الفاشي بقيادة مارزل الى ام الفحم كان لها الكثير من الايجابيات

و"شوفة عينك" شايف انو كل الاطراف كانت مبسوطة.

منبلش:

سياسيا:

* ام الفحم موحدة بكل احيائها وعائلاتها بعد الانتخابات البلدية والكنيست (ظاهرة نادرة في بلداتنا العربية).

* اول نائبة عربية تستنشق الغاز المسيل للدموع.



في الصورة( حنين زعبي تسنشق الغاز المسيل للدموع كأول نائبة عربية في الكنيست)









* محمد بركة يكبح جماحه ولا يضرب شرطي او جندي خلال المظاهرة مما حال دون تقديم دعوة جديدة ضده مما كان سيؤدي وبشكل غير مباشر الى هجمة سلطوية عنصرية على الجماهير العربية الباقية في وطنها.




في الصورة ( محمد بركة وهو يكبح جماحه)

* رائد صلاح يرسخ مفهوم ان ام الفحم امارة له اعلاميا (كل الفضائيات بدها رائد صلاح... ومالو رجا اغبارية؟؟).
* ارتفاع منسوب المد الوطني في ذبذبات اثير اذاعة الشمس (بعد الانقطاع منذ الحرب على غزة).
* دعاة التعايش انتهزوا الفرصة ودعوا للتعايش.


اقتصاديا:

* انتعاش المحال التجارية التي تقع على مداخل ام الفحم.
* انتعاش محلات الاراغيل (الشباب وعلى مدار اسبوع يخططون للوقفة).
* انتعاش سوق البصل في ام الفحم والمنطقة ( بعض المزارعين اطلقوا على ذلك اليوم بانتفاضة البصل).






انتفاضة البصل...
اجتماعيا:

* وحدة وحدة وطنية.... الشب بحد الصبية ( اللي بعرف بعرف.. حللوها لحالكو).
* مسابقات لامنهجية في ضرب الحجارة لليافعين... مين بصيب عيون اكثر.

العين بالعين.. والبادي اظلم(من المسابقات اللامنهجية)

ام الفحم... الاسم الحركي لفلسطين

غسان كنفاني

اسئلة بحاجة لاجوبة... غير مستعجل، على مهلكو..

هيك اكمن سؤال على السريع للشباب الحزبي على مختلف الوانه

*يعني انا كتيير محتار من وين ابلش.. الصراحة الرفاق في الشبيبة الشيوعية يا هنني مش عارفين وين الله حاططهن يا مش عارفين وين بدهن يحوطونا...:

1- انو ليش يعني "اتحاد الشبيبة الشيوعية الاسرائيلي"؟؟ ، يعني انا مش فاهم، ليش الاسرائيلي؟، اذا بدكوش مصطلح "الشبيبة الشيوعية العربية او الفلسطينة" من شان الرفاق اليهود على اساس انتو حزب اممي، اوكي يا عمي منتفهمكو بس ليش "الاسرائيلي"؟ انو بنفعش الشبيبة الشيوعية لحالها..؟؟ او الشبيبة الشيوعية في اسرائيل متلا؟؟.. يعني ليش الاسرائيلي؟؟ اننو انتو اسرائيليين شي؟ هويتكم اسرائيلية شي؟ ( الثقافية ؟ )... مهو بدنا نفهم.. لانو بسير كتير لغط والو كتييير انعكاسات سلبية مش حلوة بالمرة.. اه والله..شوفة عينك يعني.. انو انا شاب عربي فلسطيني..خلقت بعد ما قامت دولة الزفت اسرائيل.. وتع تنقول انو انا شيوعي.. يعني لازم اكون شيوعي اسرائيلي..؟؟ انو بس ليش اسرائيلي..؟؟؟؟؟ شو هلقد جابر ربكو وشادين على طيازكو ب "الاسرائيلي"؟؟ طيب يا اخي انا عربي فلسطيني مالني ومال الاسرائيلي..؟؟

2- طيب ليش ما فش متلا الشبيبة الجبهوية؟؟ انا متلا شاب جبهاوي مش شيوعي... وبعرف انو في وحدة حال بين الحزب الشيوعي الاسرائيلي وبين الجبهة الديمقراطية للسلام والمساواة... بس انا جبهاوي.. ما خصنيش بماركس ولا لينين.. ما بتمثلنيش لا الشيوعية ولا الشبيبة الشيوعية الاسرائيلية... وبدكو اياني اجند واجي لمهرجان يوم الارض تاع الشبيبة الشيوعية الاسرائيلية كماااان...

3- مهو كمان شغلة.. يعني كيف شبيبة شيوعية اسرائيلية.. ومهرجان يوم ارض..مهو اسرائيل اللي نا*ت رب الارض.. يعني مش حلوة بحق يوم الارض نفسو... بعدين دخلك شو كان دور الرفاق اليهود بيوم الارض... بعدين شو موقف الرفاق اليهود من انو الارض اللي بمشو عليها وبعمرو عليها بيوتهن كانت ارض للعرب...

والله شوفة عينك شي بحير يابا....

.

.

.

*على كل حال.. خلينا نشوف الوضع عند الشباب القومي.. مش هيك بسمو حالهن.. اتحاد الشباب الوطني الديمقراطي..يعني هنني الصراحة لفترة كانو عاجبيني (اسا بفكرو انو "شوفة عينك" تجمعي.. لأ مش تجمعي..منييح)، بس يا اخي منبلش ب:

مهرجان لاتحاد الشباب ضد الخدمة الوطنية الاسرائيلية

1- اننو انتو ليش دايما بالمظاهرات بتمشو مفرفطين... اننو الصراحة راحة.. ثلث ترباعكو بكون ماشي ورا نضال بدارنة وابناء البلد..( ويا جبهتنا الشعبية بدنا منك عملية)، مالكو ومال الشعبية... الشعبية ما بتفوتش كنيست..اه والله... ما بفوتوش كنيست... يعني ديرو بالكو ابناء البلد عم بخربوكو بالمظاهرات.. عم بعملوكو متطرفين...ولا شو رايكو؟

2- قبل سنة سطلتونا بمهرجانات ضد الخدمة المدنية او الامنية كيف بتحبو تسموها.. طيب ممتاز.. أُعجبنا فيكو.. وبعدين.. وشو مع ال 100 الف توقيع اللي قولتو بدكو تلموهن ضد خدمة الزفت هاي؟؟ ليش بتعملو حالكو ** نمر وانتو مش قدو..

3- وقبل شي سنة تقريبا كمان سطلتونا بمؤتمر اتحاد الشباب.. والجرايد كلها ملاني اخبار عنكو تحضير للمؤتمر.. ويوم تطوع تمهيد للمؤتمر.. وتجنيد للمؤتمر.. وتلحيس للمؤتمر والمؤتمر بدو يوكل الدنيا اكل... طيب حلو... بس اللي صار انو من يوم المؤتمر (اللي دفعت تكسي سبشل من شان اجي على الافتتاح) لليوم مش شايفين اشي منكو ... وين الشباب لن يكل وهمه ان يستقل او يبيد او يبييييد؟؟؟

.

.

.

* اما شباب الحركة الاسلامية.. بشقيها الجنوبي والشمالي (اخوة تنين في دنيا العرب... كتيير واضح) بشوف انو:

أقرأ في جامعة حيفا

1- مش شايف اشي تأشوف انو..

2- برضو مش شايف اشي بعدني...

3- يعني "شوفة عينك" كتيير متابع بس مش شايف او يمكن مش عارف.. مفش عندكو اتحاد الشباب المسلم او شي من هالنوع.. بعرف وشايف انو في كتير فعاليات وفي كتير مؤسسات وجمعيات واللي الشباب الو دور فيها (أقرأ، وحرأ، والفرقان وهالما جرا..) وغير العمل الطلابي في الجامعات اللي من جديد بلش يسير بشكل جدي، بس مفش منظومة شبايبة غير النشاطات الدعوية.. يا اخي شي امسية (بلاش اغاني مش دينية.. راح اجي وبرضو ادفع تكسي سبشل.. بس نشوف اشي)، او شي مهرجان ضد الخدمة المد/امنية... يعني الاخوة في الجبهة والتجمع مفظعين... انا عارف.. الله يهديكو..

.

.

.

*اما الرفاق الشباب في ابناء البلد (بشقيها ايضا...عم بسمع حكي انو يمكن في كمان شق ثالث)... فيا حويلتي عليهن:

شباب ابناء البلد خلال مهرجان خروج امين عام ابناء البلد من السجن -عرابة

1- بالبداية...بدي اعرف بس هيك على السريع.. شق رجا اغبارية عندو شبيبة شي..؟؟

2- ليش زنبوركو طالع بس وقت انتخابات الكنيست.. وبتبلشو بحملات فيسبوكية (والمسنجر) لمقاطعة الكنيست..طيب اوكي منعرف موقفكو من الكنيست.. بس مش شايفينكو على الساحة بزنبور عالي الا وقت الكنيست... بعدين دخلك شو هالشعارات البايخة :" اذا الشهيد صوت انا بصوت" طيب بلكي الشهيد كان يصوت للكنيست؟؟؟ وللا "مقاطعة حتى العودة".. كنها تحققت العودة بال 1996..؟؟ موقتها نزلتو وصوتو واشتغلتو انتخابات...كلكو...اه كلوكو.. يم واحد واحد.

3- بلشو فكرو كيف تتوسعو جماهريا يا عممي... والله خوفي مش منكو انا خوفي عليكو (والنصيحة بجمل)، انا بعرف انكو ناس وطنيين، ومعجب فيكو.. بس ما بسرش حاملين شعارات وبس.. جربو ترجمو غضبكو ما بين مظاهرة يوم الارض وما بين مسيرة العودة بذكرى النكبة وما بين مظاهرة هبة القدس 2000 بشي مفيد.. حاجة بس تشدو على حالكو بالمظاهرات.. والواحد بحس اننو فلسطين هاليومين وبتتحرر (في شعارات قوية وحلوة لأيش الحكي)...و "شوفة عينك" شايف وخايف والله عليكو (اسا بفكرو "شوفة عينك" ابناء بلد... لأ مش ابناء بلد ..منييح)، يعني شايفينكو عم تنقرضو بالجامعات وهنالك من يسعى كي تنقرضوا( معلمومة من الداخل).

على هامش احتفالية القدس عاصمة الثقافة العربية 2009

من باع فلسطين وأثرى بالله
سوى قائمة الشحاذين على عتبات الحكام
ومائدة الدول الكبرى ؟
فإذا أجن الليل
تطق الأكواب بان القدس عروس عروبتنا
أهلا أهلا أهلا

القدس عروس عروبتكم
فلماذا أدخلتم كل زناة الليل إلى حجرتها ؟؟
ووقفتم تستمعون وراء الباب لصرخات بكارتها
وسحبتم كل خناجركم
وتنافختم شرفا
وصرختم فيها أن تسكت صونا للعرض
فما أشرفكم
أولاد القحبة هل تسكت مغتصبة ؟

*مظفر النواب

زناة الليل

خطاب السيد الرئيس محمود عباس (طول الله صبره في المفاوضات) في افتتاح "احتفالية القدس عاصمة الثقافة العربية 2009" في بيت لحم:

شعب فلسطين الابي...

ها قد مضى انابوليس 2008 ونحن الان في عام 2009.. وقد تحقق حلم الاوسلوويين باقامة الدولة الفلسطينة وعاصمتها القدس الشريف، وقد اثمرت جهود المناضلين المفاوضين باقناع "الشريك" الاخر على احقية الشعب الفلسطيني في 13% من ارض اسرائيل، وذلك كله بعدما عملنا في المفاوضات حسب مقولة طيب الذكر (بس مش طيب اللي اكله اخر ايام حصار المقاطعة) ابو عمار.. "يا جبل ما يهزك ريح"، ونحن كنا جبل وسوف نبقى جبل حتى العودة..عودة اخر مفاوض عالق على الحاجز.

ومن هنا اطالب قيادة حماس بالاعتراف بالاتفاقيات السابقة بيننا وبين اسرائيل لكي نستطيع اكمال فعاليات القدس عاصمة الثق.... في بيت لحم ورام الله كما وعدني اولمرت وعده الاخير، وذلك وفاء للاوراق والاقلام (والاراضي) اللي صارت بيننا في المفاوضات.

والسلام عليكم ورحمة اللي جاي (نتنياهو) وبركاته

.

.

.

.

"شوفة عينك" معقبا: والله اذا بعطوك يا ابو مازن حكورة بشغفاط تعملها عاصمة بكون كتييير منييح....

تحيات لاعضاء الكنيست العرب 1

*تحية لعضو الكنيست محمد بركة، وذلك على صموده في التحقيقات الاخيرة، تحية لنهجه في ضرب الشرطة خلال المظاهرات، وتحية لبقائه في الوطن وعدم الهروب ومواجهته التهم التي الصقت اليه ظلما...شوفة عينك اخونا جدع.

*تحية لعضو الكنيست سعيد نفاع على مقاله الاخير "السلوك الانتخابي للعرب الدروز" وعلى مساعيه لتأسيس فرع للتجمع في يركا-جولس منذ عام 1999، حتى تحقق الحلم في 2009، الى الامام.

*تحية لعضو الكنيست ابراهيم صرصور... خليك هيك دايما دير الاجتماعات بلجنة المتابعة عبين ما يسير في رئيس... اوعك تخلي الشيخ رائد يوخدها منك، بعدين مداخلتك الاخيرة في اجتماع لجنة المتابعة عن اهمية انتخابها مباشرة كتيير مهم.. بس يا ريت تطبقو على ارض الواقع.

شوفة عينك.. اجتماع لجنة المقارعة مؤخرا

*تحية لعضو الكنيست طلب الصانع على صموده داخل القائمة الموحدة و العربية للتغيير.


*تحية لعضو الكنيست ايوب الخرا* على زيارته التضامنية لخيمة التضامن مع الجندي "المختطف" البريئ غلعاد شاليط، كما ولا ننسى ان نحيي جاهة المشايخ والزعامات التي حضرت وطالبت اسماعيل هنية باطلاق شاليط... يا ولاد الشليييطة.

شوفة عينك .. خرا في خيمة شاليط للتضامن... خرا على هيك تضامن

ملاحظات للتنويه مما اقتضى التنويه:
*الحقوق الفكرية والنشر محفوظة لمدونة "واحد مستقل فكريا" على استعمالنا مصطلح "ايوب الخرا".

شوفة عينك...

هي زاوية ساتيرا لسان حال المدون "شوفة عينك*" في مدونته "ساتيرا والله يستر"، وهي غير حزبية او ربحية وغير محدودة ضمان فعاليتها.


شوفة عينك.. يتناول مواضيع الساعة واليوم والاسبوع والشهر والسنة.


شوفة عينك ايضا قد يتعرض لبعض الاشخاص المعروفة، لكن كله بنية طيبة.


مواضيعها مجتمعية في السياسة والاقتصاد والامور الاجتماعية في البلاد*


وهيدا بلد... لأ مش بلد
فهيا الى الساتيرا ... هيا الى الحياة
والله يستر


وشوفة عيوننا مستمرة


ملاحظات للتنويه مما اقتضى التنويه:
*مصطلح "شوفة عينك" موجه للجنسين و ثنائي الجنس ايضا.
* قد نخرج عن النص احيانا مراعاة للظروف المفصلية.

ساتيرا.. والله يستر

هذا الاسم الذي اخترته لمدونتي لاعلن انطلاقها في سماء المدونات او بحر المدونات او شلال او وادي (اللي بدكو اياه) او حتى جورة مجاري

اخترت الساتيرا لعلها تُضحكنا و ما احوجنا اليوم للضحك من البلايا التي شرها ما يُضحك

لنضحك على انفسنا قليلا او كثيرا لربما نُغير بأنفسنا قليلا او كثيرا (مفضل كثيرا) ما لم يستطع ان يغيره الله بقوم

او لعل الساتيرا تبكينا... وشر البكاء ما يُغير